SALUD. RESPONSABILIDAD DI CADA UN

Antes bo tawatin salud si bo no tawata malo. Awendia salud tin un nificashon mas amplio. Organisashon mundial di salud (WHO) ta describi salud como ‘un situashon di completo bienestar fisico, mental y social’. Esey ta zona bunita, pero kico e ta nifica realmente?

Un situashon ta indica solamente un cierto momento. E no ta bisa nada di actividad, e proceso pa yega na e situashon ey. Pesey ta miho pa papia di ‘wellness’ of ‘wellbeing’. E terminologia aki ta duna miho indicashon cu ta trata di un proceso na unda ta traha continuamente na realisashon di bo potencialnan. Esey semper ta tuma luga. Cu otro palabra, ‘welness’ ta un actividad y ta rekeri iniciativa personal.

Den caso di ‘wellness’ ta trata di tur aspecto (fisico, mental, emocional, social y spiritual) di e persona. Den nos bida diario nos actividadnan semper ta influencia un of mas di e aspectonan aki. E actividadnan aki semper ta encera escogencia, manera kico nos ta come, na ki manera nos ta relaha nos mes y asina combati stress, con nos ta comunica cu otro hende y con nos ta trata nos medio ambiente.

Pa nos haci bon escogencia, ta necesario pa tin algun bista di e riesgo- y posibilidadnan riba cada tereno. Asina nos ta dispone di nos curpa, cu por lo general ta adapta su mes perfectamente na e exigencianan cu nos ta pone p’e. Si nos hiba un bida na unda nos no ta exigi mas di nos curpa cu djis sinta na scol, trabou of den auto y drumi dilanti televishon, nos organonan ta adapta nan mes perfectamente na e exigencianan ey. Un esfuerso un tiki mas grandi ya caba ta nifica hopi lihe un esfuerso mucho grandi p’e curpa.

Pesey tambe nos mester siña con nos curpa ta funcshona, cualnan ta su posibilidadnan, ki estilo di bida ta miho pa nos hiba pa eherce e actividadnan normal di tur dia sin mucho esfuerso. Tambe kico y cuanto nos mester come of laga di come pa permiti nos haci bon uzo di nos curpa of goza di dje pa hopi tempo. En corto, nos mester siña biba den harmonia cu e exigencianan di nos curpa. Esey ta responsabilidad di cada un di nos.

• obesidad

• sucu, un veneno?