CIENCIA Y SPIRITUALIDAD

Ciencia y spiritualidad ta parce polo opuesto. Un persona spiritual ta ‘flota’, ta kere den asunto nebuloso manera ‘experencia di casi-morto’, coriente di energia y comunicashon cu fayecido. Un cientifico no kier sa nada di esaki, pero ta analisa tur cos detayadamente. E actitud critico aki ta haci di dje un persona sin sentimento, materialista, o sea un hende a-spiritual. E prehuicionan aki cada bes mas ta perde tereno pa e experencia cu cientifico den nan trabou ta inspira nan mes cu spiritualidad, pero tambe cu hende cu orientashon spiritual regularmente ta haci uzo di conocemento cientifico pa haya un entendimento mas profundo. Como tal, ciencia y spiritualidad no ta opuesto di otro, pero mas bien nan ta complementa otro. Asina ciencia medico cada bes mas ta haci uzo di meditashon spiritual pa siña pashent maneha nan stress. Di otro banda investigashon di e practica spiritual ta conduci na hayazgo cientifico nobo. Di e manera aki ta parce cu e punctualidad cientifico y e sensibilidad spiritual ta forma un unidad cu ta cumbini creatividad y curiosidad.

Hopi di nos a lanta den un mundo na unda e papel di ciencia a bira cada bes mas importante. Spiritualidad casi no tawatin ningun importancia. Hopi biaha tamba sa confundi spiritualidad cu fe pa medio di religion institutionalisa cu tawata perdiendo su prestigio y su monopolia di importancia pa motibo di su papel dudoso den historia di humanidad.

E ultimo añanan ‘spiritualidad’ ta atrae un cantidad creciente di hende, specialmente pa medio di filosofia oriental. Nan ta sinti cu e spiritualidad ey ta duna nan mas entendimento con pa biba. Asina nan a experencia mas trankilidad y felicidad. Contrario na hopi religion, spiritualidad no ta un sistema di alabansa cu tur sorto di ritual, pero mas bien ta enfoca riba un actitud positivo pa cu bo mes y otronan. Asina ta experencia bida mas bien como un placer en bes di un lucha. Ta aspira pa un bida feliz pa locual hopi biaha relashon satisfactorio y un bon sentido di bida ta suficiente. Pasobra no ta logra felicidad cu cos material, sino di parti paden.

Ciencia kier splica mundo. Spiritualidad kier experencia mundo. Pesey tambe no por cuantifica of prueba spiritualidad. Mas bien ta trata di na ki manera ta experencia tur cos ‘di paden’. Ta un postura di bida cu ta mas basa riba intuishon y sentimento cu riba inteligencia. Pa hopi hende esey ta haci dificil pa haci contacto cu ‘e dimension spiritual’. Asina mes tin un fluho creciente di informashon. Den e cuadro aki poco poco lo purba di crea un vishon ordena. Cu e base aki cada lector por busca su propio caminda pa felicidad y sentido di bida. Al fin y al cabo e lo biba den harmonia cu universo.