ANALISIS DI TAREA NUCLEO DI GOBIERNO
Durante decada varios instancia a mustra riba e echo cu e aparato di empleado publico ta mucho grandi pa e necesidadnan di Aruba. Regularmente instancia manera Conseho Socioeconomico (SER) a indica cu mas o menos 25% di personal tawata di mas. Asina mes pa gobierno no tawata ningun obstaculo pa sigui nombra mas empleado publico. Esey tawata cuadra cu e proceso politico partidista pa mara votador pa medio di nombrashon di personal. Pasobra segun ‘norma’ internacional, 1 nombrashon por genera 4 voto di famia. Pa partido cu kier keda na mando pa un tempo largo, e sistema ey ta duna cierto garantia pa un cantidasd minimo di voto.
A base di conseho hopi urgente di instancia financiero-economico (inter)nacional y e desaroyo precupante di finansas publico, gobierno di partido MEP di e tempo ey por fin a dobla rodiya pa laga ehecuta un analisis di e tareanan nucleo di gobierno. E analisis mester a determina cua tarea gobierno mester ehecuta di berdad y cuanto hende tawatin mester di cierto preparashon pa ehecuta e tareanan ey debidamente. Automaticamente lo bira cla exactamente cuanto hende lo tin mester den e aparato di empleado publico. Despues di a ricibi e raport na 2008, a scondi’e hopi profundo den un lachi y pues e gobierno(nan) no a duna ningun follow-up na e raport (costoso) di analisis di tarea nucleo di gobierno.
Mientrastanto e situashon financiero di Aruba ta tal cu mester corta severamente den e gasto di personal. Mantene un aparato asina grandi y ineficiente manera e ta actualmente ya no ta un opshon. Sinembargo, despues di 7 aña di ‘maneho’ di gobierno , algun cos a cambia. Pues no por uza e conclushonnan di e raport sin mas como punto di salida pa e proceso di toma di decishon. Di otro banda situashon no a cambia di tal indole cu e raport ya no tin balor mas. Pues, pa evita destrucshon di capital, mester evalua y ehecuta locual ainda ta valido. Pa tin un idea di locual e analisis di tarea nucleo ta encera, por repasa algun ilustrashonfor di e analisis di tarea di 2008.
MINISTERIE VAN ALGEMENE ZAKEN
MINISTERIE VAN JUSTITIE
MINISTERIE VAN ONDERWIJS, SOCIALE ZAKEN EN INFRASTRUCTUUR
MINISTERIE VAN FINANCIEN EN ECONOMISCHE ZAKEN
MINISTERIE VAN ARBEID, CULTUUR EN SPORT
MINISTERIE VAN VOLKSGEZONDHEID, MILIEU, VREEMDELINGEN-EN ADMINISTRATIEVE ZAKEN
MINISTERIE VAN TOERISME, TRANSPORT