biba den harmonia
Regularmente sa crea e musica mas bunita pa medio di instrumento totalmente diferente cu cada un ta produci un otro zonido. E coperashon ey, e simbiosis di e diferente zonidonan pa al fin y al cabo toca un solo pieza musical, ta crea e impreshon di harmonia. E zonidonan ey ta cuadra cu otro y ta reforsa otro. E combinashon ey ta mas cu e suma di cada instrumento separa.
Harmonia por tuma luga riba tur tereno. Nos ta saludabel, ta biba den harmonia cu nos mes, si nos scucha nos curpa y nos mente y ta cuida nan segun nan necesidad. Nos ta biba den harmonia cu nos yiunan, nos mayor- y prohimonan si nos compronde den ki fase di desaroyo nan ta, kico nan tin
mester den esey y na ki manera nos por contribui n’esey. Nos ta biba den harmonia cu comunidad di cual nos ta forma parti si gobierno labora segun e principionan di bon gobernashon y ciudadano ta duna un aporte na mehorashon di nan comunidad a base di nan propio sentido di responsabilidad. Nos ta biba den harmonia cu naturalesa si nos compronde con e ta funcshona y na ki manera nos por aporta pa ten’e saludabel. Di e manera ey nos ta tene nos mes saludabel tambe.
Pero riba hopi tereno ta parce cu nos a aliena for di e ‘bon marcha di asunto’. Salud di hopi hende ta laga di desea cada bes mas. Conflicto entre generashon y conflicto entre hende , entre grupo di hende na un pais y entre pais ta na ordu di dia. Bon gobernashon na mayoria di pais no ta algo cu ta papia pa su mes mescos cu tumamento di propio responsabilidad pa ciudadano pa cu su comunidad. Nos actitud di consumido ta hiba na un abismo creciente entre rico y pober, un polushon enorme y calentamento espantoso di mundo. Haciendo esaki nos ta trece subsistencia di mundo y pues di nos mes na peliger. Di e manera aki nos ta trahando riba nos propio destrucshon. Pa nos hende, cu ta ‘bendishona’ cu e inteligencia maximo di tur ser vivo na mundo, esaki ta un desaroyo completamente iracional.
Si nos kier sobrebibi, ta hopi cos mester cambia masha hopi mes. Esey por solamente si nos tur compronde con nos mes, esta hende, comunidad y naturalesa rond di nos por funcshona miho, tanto individualmente como conhuntamente. Pero mester ta cla tambe den kico nos ta faya, ki consecuencia e fayonan ey tin y ki paso nos mester tuma pa mehorashon. Esey ta un tarea di nos tur. Pasobra tur hende ta sufri daño si algo bay malo, pero na mesun manera tur hende ta disfruta si cos ta marcha bon y nos por biba den harmonia cu nos mes y cu tur hende y tur cos rond di nos.