CREDIBILIDAD

E ultimo añanan MEP, como partido mas grandi di oposishon, ta sigui e tradishon politico di Aruba pa di biaha duda of categorisa como corupshon tur cos cu partido di gobierno AVP ta inventa y dicidi. Si tuma na cuenta e practica politico di e ultimo decadanan, indudablemente MEP tin tur razon pa su critica. E pregunta grandi ta si e ta e partido mas indica pa mustra dede riba asunto di integridad.

T´e mas o menos 7 aña pasa MEP, como partido di gobierno, tawata haci su mes util dor di mustra continuamente riba diferente proyecto di AVP na unda, segun e, corupshon a tuma lugar. Entre otro nan a nombra e proyectonan di radar, waf y aeropuerto. Pa MEP, cu tur su razon, tawata incomprendibel cu esnan responsabel ainda tawata cana libremente rond.

Di un dia pa otro MEP a para su acusashonnan. Critico a mustra e partido cu den e tempo ey nan a acepta cu hopi fanfara den nan propio seno hustamente e (ex)ministro responsabel pa e proyectonan menshona. Esaki tawata hopi incomprendibel pasobra e mesun persona tawata responsabel tambe pa asunto manera ´Lucht- en zeebrieven´, construcshon costoso di kiosk postal ´no-existente´ y e acuerdo dudoso cu Fabela cu na Corsow a percura pa encarcelashon di e ministro responsabel. Al fin y al cabo Conseho di ministro di Aruba mester a blokea e acuerdo cu Fabela pa evita lo peor. Tambe e tawatin di ber cu bancarota di Air Aruba. Segun Contraloria General e ministro aki a exlui parlamento di Aruba completamento for di su tarea di control. No solamente no a informa parlamento di e desaroyonan den proceso, para tambe a neglisha completamente pregunta di parlamentario pa studia contracto. Su practicanan tawatin como consecuencia cu e gobernador di e tempo ey a califik´e como ´no-ministeriabel´.

Sinembargo, no tawata trata simplemente di cu su acshonnan como ministro tawata dudoso y asta ilegal. Pa pais Aruba su decishonnan al fin y al cabo tawatin como resultado un daño di varios decena miyon florin. Asina mes su coleganan politico no a tum´e hopi na malo, pasobra AVP, cu poco prome a califik´e como postema, tawatin mester di su coperashon pa forma un gobierno. MEP despues tampoco no a haci nada pasobra su tio como ministro di husticia no solamente tawata carece e experticio necesario, pero riba dje regularmente tawata demostra un falta completo di huicio racional. No ta por nada cu Hulanda a pon´e parcialmente bou di curatela.

Un di e ultimo hazañanan di e ex-ministro na aña 2000 durante gobernashon di AVP tawata un pago di Af. 677.003,87 na empleado di WEB pa ´perdida di indexering´ despues di privatisashon di e empresa. Segun e siguiente gobierno di MEP (!) cu a cuminsa un caso contra e ex-mandatario en cuestion pa cobra e suma, inclusivo interes y gasto di cobransa legal, tawata trata di un acto ilegal, violando ley di comptabilidad. Corte den prome instancia a duna pais Aruba razon. Corte superior despues a reconfirma e veredicto aki den un caso entama pa e ex-ministro. Mientrastanto e suma a surpasa Af. 800.000,- pa motibo di e interes legal. Sinembargo, no ta cla si e ex-minisro en cuestion ya a cumpli cu e veredicto aki. Awor cu e tin un entrada substancial como parlamentario y pais Aruba ta den un situashon financiero pesimo, ministro di finansas no tin otro opshon cu ehecuta veredicto di hues.

Pues ta hopi remarcabel cu partido MEP a duna e politico aki un posishon prominente riba e ultimo lista di elecshon, specialmente tumando na cuenta e noticianan di su bon amistad cu yiuhomber di presidente di Surnam, cu actualmente mester duna cuenta na Merca di su actividadnan di contrabanda di droga y arma. Haciendo esey, MEP ta duna di conoce sin mas cu p´e integridad no tin ningun importancia y cu e ta duna solamente servicio di lip na dje. Asina tambe e ta sigui sin ningun problema e maneho di su lider anterior cu a declara despues di elecshon di 2005 cu campaña y gobernashon ta dos cos hopi diferente. Riba dje e lider actual a declara despues di acusashon di AVP pa cu e ex-ministro en cuestion, cu pa MEP ta mas importante cu nan ta funcshona como un famia grandi. Asina e ta indica bon cla cual ta su prioridad principal. Di e manera aki MEP no solamente a haci su mes completamente ridiculo, pero tambe a perde tur credibilidad.